“Crocus City Hall” цогцолборын халдлагыг санхүүжүүлж, зэвсэглэсэн, Каспийск хотод өөр нэг халдлага явуулахаар төлөвлөж байсан гадаадын террорист байгууллагын гишүүдийг Дагестанаас баривчилснаа Оросын Холбооны Аюулаас Хамгаалах Алба (ФСБ) өчигдөр мэдээлжээ.

“Гуравдугаар сарын 31-нд ФСБ-ийн Дагестан дахь салбар Каспийск хотод олон нийтийн газар террорист халдлага үйлдэхээр төлөвлөж байсан гадаадын дөрвөн иргэнээс бүрдсэн террорист бүлэглэлийн үйл ажиллагааг таслан зогсоолоо” гэж дээрх мэдэгдэлд өгүүлсэн байна.

Мөн тэд гуравдугаар сарын 22-нд Москва хотын “Crocus City Hall”концертын танхимд гарсан террорист халдлагыг санхүүжүүлж, зэвсэглэснийг тогтоосноо бас мэдээлжээ.

ФСБ террористуудын байрлаж байсан газраас гар хийцийн тэсрэх бөмбөг, автомат буунууд олсон гэнэ.

Тэд халдлага үйлдсэнийхээ дараа ОХУ-ын нутаг дэвсгэрээс гарч явахаар төлөвлөж байсныг илрүүлжээ.