Хөвсгөлийн догшин их сарьдаг, Далай ээждээ хүндэтгэл үзүүлэх мөсний баярыг зохион байгуулах ажлыг “Хаант тэнгэрийн самгалдай” төрийн бус байгууллагаас санаачилжээ. Маргааш буюу энэ сарын 03-ны өдөр тус байгууллагын тэргүүн Б.Батчулуун бөө нарын хамт их тахилга хийхээр төлөвлөжээ.
Маргаашийн 19.00 цагт эхлэх тахилгын ёслолд эртлэн очсон эхний 150 хүнд Далай ээжийн хишиг тарааж, долоон гал бадраан, даллага авч, уул ус, лус савдаг тахиж нутгийн зон олны хэтийн амар амгалан, бие сэтгэлийн эрүүл энхийн засал тэргүүтнийг үйлдэх аж. Тус баярын онцлог нь Хөвсгөл нуурт их тахилга анх удаа үйлдэж буйгаараа урьд жилүүдийн баяраас ялгаатай гэнэ. Баярын үеэр бөөгийн зан үйлээс үзүүлэхийн дээр явуулын гэр музей үзүүлж, биет болон биет бус соёлын өвийг ард иргэдэд сонирхуулах гэнэ.
