Австралийн Брисбэн хотод нялх хүүхдийн нүүр рүү халуун кофе асгасан эрэгтэйг цагдаа нар олон улсын түншүүдтэйгээ хамтарч эрэн сурвалжилж байна. Уг хэрэг өнгөрсөн сард гарсан бөгөөд есөн сартай хүүхдийн нүүр, үе мөч нь ноцтой түлэгджээ. Тухайн сэжигтэн нь 33 настай гадаадын иргэн болох нь тогтоогдсон. Тэрбээр хэрэг үйлдсэнээс зургаан хоногийн дараа Австралиас оргон зайлсан байна. Квинсландын цагдаагийн алба гэмт хэрэгтнийг баривчлах тушаал гаргаж, бие махбодод хүнд гэмтэл учруулсан хэрэгт буруутгаж байна.

Хэрэв олон улсад болон Австралийн газар нутаг дээр баривчлагдвал бүх насаар нь хорих ял өгч магадгүй.

Өнгөрсөн Даваа гаригт мөрдөн байцаагчдын мэдээлснээр, сэжигтэн хувийн мэдээллийг нь олж тогтоохоос 12 цагийн өмнө оргон зайлсан байжээ.

Хохирогч есөн сартай хүүхэд хэрэг гардаг өдөр буюу наймдугаар сарын 31-нд гэр бүлийн хамт хотын захын цэцэрлэгт хүрээлэнд амарч байв. Гэрчийн мэдээлснээр, тэдний амарч байсан газарт нь “хачин, жигтэй хүн” ойртон очиж, гартаа байсан аягатай кофегоо шууд хүүхдийн нүүр рүү цацаад зугтсан байна. Хүүхдэд нэн даруй анхны тусламж үзүүлсэн бөгөөд хэргийн газар ойрхон явж байсан сувилагч хүүхдийн түлэгдсэн хэсгүүдийг хүйтэн усаар шавшсан байна. Гэсэн хэдий ч түлэгдэлт ноцтой байснаар хэд хэдэн мэс засалд орох шаардлагатай болсон. Хохирогч хүүхдийн эцэг, эхийн хэлснээр түүнд урт хугацааны эмчилгээ хэрэгтэй байгаа аж.

Сэжигтэн ямар шалтгааны улмаас хүүхдийг гэмтээх болсон нь тодорхойгүй байгаа ч цагдаа нар түүнийг аль улс руу ниссэн болохыг олж тогтоосон.

Мөн мөрдөн байцаалтыг удаашруулахгүйн үүднээс сэжигтний хувийн мэдээллийг олон нийтэд зарлахаас татгалзжээ. Хэд хэдэн эх сурвалжийн мэдээлснээр, тухайн хүн 2019 оноос хойш Австралид ажиллахаар хэд хэдэн удаа ирж байсан бөгөөд аяллын визтэй байсан. Хүүхдийн эцэг эх шударга ёс тогтоолгохыг хүсч байна. Одоогийн байдлаар хүүхдийн эрүүл мэнд тогтворжсон ч арьс шилжүүлэн суулгах мэс засалд дахин орж магадгүй юм. Уг хэрэг гарсны дараа цахим орчинд хүүгийн эмчилгээнд зориулсан сайн үйлсийн аян зохион байгуулагдаж, 100 мянган ам.доллар цуглуулж чаджээ.

Эх сурвалж: BBC