“Apple” компани жил бүрийн есдүгээр сард зохион байгуулдаг уламжлалт арга хэмжээнийхээ үеэр “iPhone 15” шинэ загварын ухаалаг гар утасныхаа дөрвөн өөр хувилбар, “Apple Watch Series 9”, “Apple Watch Ultra 2” ухаалаг бугуйн цагны шинэ загварууд, USB-C цэнэглэгчтэй “AirPods Pro” чихэвч, “iOS 17”, “watchOS 10”, “macOS Sonoma” үйлдлийн системийн шинэ хувилбаруудаа танилцуулав.

“iPhone 15” цувралын стандарт загвар нь 6.1 (iPhone 15) болон 6.7 (iPhone 15 Plus) инчийн дэлгэцийн хэмжээ бүхий хоёр хувилбартай. Гаднаасаа харагдах гол өөрчлөлт нь цэнэглэгч портоо анх удаа “Lightning“ стандартаас “USB-C” стандарт болгон сольсон байна.

“iPhone 15” стандарт загварууд нь хөнгөн цагааны хайлшаар хүрээлсэн эх биетэй хар, хөх, ногоон, шар, ягаан өнгөний сонголттой аж.

“iPhone 15”, “iPhone 15 Plus” загваруудын хувьд үнэ нь өнгөрсөн оныхтой адил 799 болон 899 ам.доллароос эхэлж байгаа аж. Харин “iPhone 15 Pro” загварын үнэ мөн л 999 ам.доллар хэвээр байх бол “iPhone 15 Pro Max” загварын үнэ өнгөрсөн жилийн загвараас 100 ам.доллароор нэмэгдэж, 1199 ам.доллароос эхэлж байгаа бөгөөд энэ сарын 22-ны өдрөөс худалдаанд гарна гэж тус компани мэдээллээ.

“Pro” загвар нь 2020 онд “Apple” компанийн анхны 5G дэмждэг гар утаснууд худалдаанд гарснаас хойш хийгдэж буй томоохон шинэчлэл болж байгаагаараа онцлог юм. “iPhone 15” цувралын “Pro” загвар нь стандарт загвартайгаа адил 6.1 (Pro) ба 6.7 (Pro Max) инчийн дэлгэцийн хэмжээгээр ялгаатай хувилбаруудтай байгаа аж.

Хамгийн сүүлийн үеийн A17 чип бүхий “Pro” загварын эх биеийг сансрын хөлгийн үйлдвэрлэлд ашиглагддаг титанаар хүрээлжээ. Ингэснээр өмнөх бүх “Pro” загваруудаас хамгийн хөнгөн жинтэй болсныг “Apple” онцолж байна.

Үүнээс гадна “Apple”-ийн шинээр танилцуулсан ухаалаг бугуйн цагны шинэ загвар “Apple Watch Series 9” нь дохио зангаагаар удирдах, гэрэлтүүлгийг хоёр дахин нэмэгдүүлэх, homepod-той хосолж ажиллах функцтэй болжээ. Мөн өмнөхөөсөө сайжирсан шинэ S9 процессортой болж, “all-day” буюу бүтэн өдөр ажиллах багтаамж бүхий батарейтай болсон байна. Series 9 загварын GPS хувилбар 399 ам.доллар, GPS болон үүрэн холбооны хувилбар нь 499 ам.доллароор худалдаанд гарна. Харин GPS болон үүрэн холбооны ганц сонголттой “Apple Watch Ultra 2” загвар нь 799 ам.доллароор худалдаалагдах ажээ.

Шинэ бүтээгдэхүүний нээлтийн дараа “Apple” компанийн хувьцааны ханш мягмар гарагт 1.7 хувиар унаж, 176.3 ам.долларт хаалаа. Энэ нь наймдугаар сарын 21-нээс хойших хамгийн доод түвшин болж байна