Евро 2024 тэмцээн Герман улсын арван хотод зэрэг болж, Европын 24 улс аваргын төлөө өрсөлдөж байгаа билээ. Улс бүрээс хөгжөөн дэмжигчид шигшээ багаа дэмжихээр Германыг зорьж, энэ зуныг зугаатай өнгөрүүлж байна. Зарим улсын фанатууд хоорондоо түнжин хагарч, Германы хууль сахиулагчдыг зовоож байгаа бол зарим нь уушийн газруудыг нь пиво, архины хомсдолд оруулж байгаа гэнэ.

Герман улс ч өөрөө пивоны түүх, соёл, амтаараа дэлхийн тэргүүлэх гүрэн билээ.

Их Британийн “The Sun” хэвлэлийн мэдээлснээр өнгөрсөн долоо хоногт Швейцарь, Шотландын тоглолтын дараа Кёльн хотын бар, уушийн газрууд пиво, архигүй болж, нөөц нь дуусчээ. Тус хотын нэгэн уушийн газрын менежерийн хэлснээр Шотландын фанатууд болох Тартаны арми алкохолын нөөцийг нь дуусгасан аж. Үүний улмаас Кёльнд очсон Английн фанатууд уух архи, пивогүй хэцүү байгаа гэнэ.

Өнөөдөр/2024.06.25/ шөнө 03.00 цагаас Англи, Словенийн тун чухал тоглолт Кёльны цэнгэлдэхэд болно. Эх сурвалжуудын мэдээлж буйгаар 50 мянган Английн дэмжигчид хэдийнэ очжээ.

Мөн Дюссельдорф хотын бар, уушийн газрууд пивоны хомсдолд оржээ. 1996 оноос хойш хаалгаа барьж үзээгүй бар пивогүй болсон учир нэг өдөр амарч, пиво нөөцөлсөн гэнэ. Тус бар л гэхэд өдөрт л 5000 аяга пивоор үйлчилжээ. Харин хамгийн их ууж буй фанатуудаар Австри, Шотланд, Английн фанатууд нэрлэгдэж байна.