Богдхан уул нь дархан цаазат газарт хамаардаг бөгөөд отог байгуулах нэрээр компаниуд газар аваад үнэтэй орон сууц барьдаг гэх шүүмжлэл өрнөх болсон. Харин Байгаль орчин аялал жуулчлалын сайд Б.Бат-Эрдэнийн тайлбараар бол тус яамнаас олгосон газрыг зориулалтын дагуу буюу аялал жуулчлалын зориулалтаар ашиглаагүй тохиолдолд газар эзэмших эрхийг нь хүчингүй болгодог. Гэвч газрын эзэмшлээ цуцлуулсан компанийн удирдлагууд шүүхэд нэхэмжлэл гарган маргаан үүсгэдэг байна. Богдхан уулын захиргаанаас өгч буй мэдээллээр зөрчлийн 180 хэрэг үүсгэсэн байдаг аж.

Газрын төлөв байдал алдагдуулсан, хууль бусаар барилга барьж эхлүүлсэн, газрын төлбөрийн үлдэгдэлтэй, хугацаандаа хүсэлт гаргаагүй гэх мэт зөрчлүүд гарсаар байгаа юм байна. Тухайлбал, өнгөрсөн хоёр жилийн хугацаанд улсын байцаагч нар байгаль орчинд учруулсан хохирлын үнэлгээнд 1.2 тэрбум төгрөгийн торгууль шийтгэл оногдуулжээ. Гэвч төлөхгүй гэж маргадаг байна.

Түүнчлэн Баянзүрх дүүрэгт 192 хуулийн этгээд барих ашиглалтын зөвшөөрөл авсан байгаа нь хууль зөрчсөн үйлдэл гэдгийг салбар яамнаас тодотгож буй юм.