АНУ-ын ерөнхийлөгчөөр Дональд Трамп дахин сонгогдвол Хойд Солонгосын цөмийн асуудлыг нэг тийш шийдвэрлэж магадгүй гэдгийг Цагаан ордны албан тушаалтан асан хэлжээ. Гэхдээ Трамп асуудлыг хэрхэн шийдвэрлэхийг урьдчилан таамаглах аргагүй юм.

Үндэсний аюулгүй байдлын зөвлөлийн Ази хариуцсан ахлах захирал асан Аллисон Хукер хэлэхдээ “Хойд Солонгосын удирдагч Ким Жон Уныг шийдвэр гаргагч дээд хүн гэж үзвэл тус улстай удирдагчийн түвшинд дипломат харилцаа тогтоох нь зөв. Трамп Хойд Солонгостой харилцаж чадна гэж бодож байгаа байх. Цөмийн асуудал байна уу, аюул заналхийлсэн байна уу, ямар ч асуудал байлаа гэсэн тэр үүнийг нь шийдэхийг хүсч байгаа. Гэхдээ яаж гэдгийг нь таамаглах аргагүй. Удирдагчийн түвшний оролцоо нь хамгийн зөв арга гэж бодож байна. Ким бол хамгийн шилдэг шийдвэр гаргагч. Хэрвээ та ямар нэг томоохон бодлого хэрэгжүүлэх гэж байгаа бол түүнтэй шууд харилцах нь хамгийн сайн арга зам” гэв.

Трамп сонгуулийн кампанит ажлынхаа үеэр Хойд Солонгосын удирдагчтай хувийн харилцаатай гэдгээ сайрхаж байсан удаатай. Тэгэхээр Трамп Цагаан ордонд буцаж ирвэл Ким Жон Унтай харилцаагаа сэргээх магадлалтай юм.

Ази хариуцсан ахлах захирал асан Аллисон Хукер нь Трампийг ерөнхийлөгч байх үед Хойд Солонгостой хийсэн чухал хэлэлцээрүүдэд нь оролцож явжээ. Мөн Аллисон Хукер нь 2001-2014 онд Төрийн департаментын Тагнуул, судалгааны товчоонд Хойд Солонгосын асуудал хариуцсан ахлах шинжээчээр ажиллаж байжээ.

Эх сурвалж: KOREA HERALD